記得以前細個，澳門經濟未起飛，截的士冇近年咁難，乘客同司機嘅關係都無而家咁緊張。

仲記得以前同屋企人一齊截的士去機場，司機大哥見我哋一箱二箱行李，會主動落車幫我哋將行李搬入車尾廂，我哋亦都會好主動同司機講聲：「唔該晒！」

不過，自從近年乘客同司機嘅予盾加劇，難免會令我哋對佢哋有刻板印象，總會覺得佢地唔係好人，上到車都唔想同司機多傾幾句。

但係，其實係咪真係所有的士司機都唔係好人？夜更司機係咪一定會㨂客兜路？今次我特登半夜出動，搵到揸咗的士三十幾年嘅亮哥同我地黎個真情剖白！

經過咗一晚嘅相處，我發現澳門仍然有一班堅守原則、服務市民嘅的士司機，我希望同亮哥以及一眾好司機講句：「別流淚心酸，更不應捨棄！澳門市民需要你哋，繼續加油！」

其實今日澳門嘅的士問題，除咗要的士業界自愛自律之外，更重要係政府必須有到位嘅監督制度，當中沿用超過十七年嘅《的士規章》必須盡快修法，提升罰則，另一方面治安警察特別係旅遊警察要加強執法，保障市民同旅客嘅搭車權利！