澳門地少車多，塞車嚴重，基本上每一個澳門人都會感受得到，搭巴士塞，揸私家車塞，揸電單車都塞，甚至連行人過馬路都困難重重。有人話，車流就係一個城市嘅血液，交通擠塞就好似城市血液循環唔暢通，會令城市生病，而對我黎講，塞車除咗會影響城市運作，更明顯仲會影響市民心理健康。近年塞車問題加劇，澳門市民嘅“燥底”指數都大幅上升。人在路上，唔理係駕駛者同行人，都希望盡快去到目的地，人車爭路，互不相讓，自然易生矛盾，心情不爽@%$#*!&$(…….

今晚同藍哥傾完計，發現加油都唔係一件簡單嘅事，日灑雨淋日夜顛倒不在話下，仲會不時面對不願意配合嘅顧客，其實真係會好危險！所以我都希望各位去油站入油時，都要好好配合油站員工，咁先可以好似藍哥話齋「開開心心嚟，開開心心走」！

其實無論車又好，人又好，當行咗一段距離嘅路，都需要加一加油，先有能量繼續完成下一段路。所以，我希望大家都可以做到，當身邊嘅人需要能量時，都可以幫佢地加一加油！而今晚，我選擇同藍哥講句「加油」，你呢？